Assam : Barak lui lianin ziaawm lam pan zel

Assam-a Silchar khawpuiin tuilian an tawrh phahna, Barak lui lian chuan ziaawm lam a pan zel a, Thawhṭanni zan aṭang khan lui tui hi hi a kam ṭan a ni.

Nimin zing dar 9 khan Barak lui-a water level hi 19.99 mm niin, darkar khat danah tui hi 1-2 cm velin a kam a ni.

June 20 aṭanga tuilian tuar tawh, Silchar khawpui dinhmun pawhin ziaawm lam a pan ṭan a, hetih lai hian khawpui chhung hmun eng emaw zat chu tuiin a la chim.

Chief minister Himanta Biswa Sarma chuan Silchar tuilian chuan mihring thlen nia sawiin, he thila mawhphurtute chu hremna na tak pek an nih tur thu a sawi tawh a ni. Cachar district thuneitute chuan Silchar khawpuiin tuilian a tawrh phahna, Barak lui-a tuilian danna tichhiaa puh mi pahnih - Mithu Hussain Laskar leh Kabul Khan an man tawh. Cachar SP Ramamdeep Kaur chuan thil awmdan hi chhui chian mek a ni tih a sawi.

May 24 khan Water Resources Department chuan khawchhung aṭanga km 3 vela hlaa awm, Bethukandi luia tuilian danna tihchhiat a nih chungchangah police-te hnenah complaint an lo thehlut tawh bawk a ni.