Meghalaya police-ten Youtuber zirtir

Meghlaya police-te chuan Thawhlehni khan local youtuber pakhat chu a channel-ah information sensitive tak a tihchhuah avangin an ko a, social media hman dan leh, chanchinthar leh information sensitive lam tihchhuah dan turte an zirtir nghal a ni.

East Khasi Hills-a additional superintendent of police Vivek Syiem chuan youtuber an koh hian dan zawm loin a channel kaltlang hian information sensitive tak hi a tichhuak a, hei vang hian dan leh kalphung zawm dan tur te, thuneitute hriatpuina lak a ṭul thute zirtir a ni tih a sawi.

Syiem chuan mi tam takin Youtube, Facebook leh Instagram platform-te chu registration process leh dan te zawm loin, news tihchhuahna atan an hmang fo tih a sawi. Chanchinthar tia an tichhuahte hi official lam aṭanga finfiahna mumal awm lo leh, report dik lo leh thu leng vak mai mai a ni fo tih a sawi bawk. Information dik lo leh thlalak dik tawk lote tihchhuah chuan mipuite rilru pawh a tihbuai phah fo a ni, a ti bawk.