Hmarchhak aṭangin Delhi Police-ah mi 433 an lut

Hmarchhak state pasarih aṭangin Delhi Police-ah mi 433 an lut a, lawmluhna inkhawm hi kar kalta Zirtawpni khan neih a ni. Union Minister of State for Home Kiren Rijiju chuan a hmanpui.

Delhi police atan hian constable 964 lak an ni a, heng zinga 433 zet chu hmarchhak mi an ni. Hmarchhak aṭanga Delhi police-a lut zingah hian postgraduate 25, graduate 347 leh B.Ed degree nei mi pathum an awm. Constable 964 lak zingah hian hmeichhia 202 an tel a, an zinga mi 134 chu hmarchhak mi an ni bawk.

Arunachal Pardseh mi Mi­nister Rijiju chuan, Delhi Police-a hmarchhak ṭhalai tam tak an lut thei chu lawm­awm a tih thu sawiin, an hna­thawhna kawngah rinawm turin a chah. Police officer-te pawh hmarchhak mite himna ngaipawimawh tura a duh thu sawiin, a bikin hmeichhiate himna chu ngaihpawimawh a ngaih thu a sawi. Delhi Police Commissioner Amulya Patnaik chuan police thar te lawmluhna hi a hmanpui a, hmarchhak ṭhalai tam tak Delhi police-a an tling chu lawmawm a tih thu a sawi ve bawk.

Police atana lak tharte hi case hrang hrang chhui turin training ṭha tak pek an ni a, hmarchhak miten ram chhung hmun hrang hranga harsatna an tawh ṭhin te leh, hmeichhe kaihnawia thubuaite pawh an chhui thei dawn a ni. Ṭawnglama harsatna an neih lohna turin kum khat dawn Hindi ṭawng zirtir an ni bawk. Hmeichhiate hi Jharoda Kala outdoor-ah inven dan training pui an ni a, ralthuam hman dan leh, rikrum thila chetdan thlengin zirtirn vek an ni. Training-a che ṭha lawman siam a ni a, hmeichhia bikah Nagaland mi constable Chiewelou Thele chuan 'all-round best trophy' a dawng a ni.

Kum 1989 khan Delhi police atan hian hmarchhak mi lak an lo ni tawh bawk a, kha tih hun laia Prime Minister Rajiv Gandhi ruahmanna kalpui a ni.