Assam : Union Minister-i'n Shatabdi Express rel service hmasa ber vai liam

Union Minister of State for Railways, Rajen Gohain chuan kar kalta Inrinni khan Assam-a Shatabdi Express rel service hmasaber chu Dibrugarh aṭangin a vai liam.

Minister Rajen Gohain chuan, Dibrugarh-Guwahati Shatabdi Express chuan zin veivahna leh bungraw phurh kualna kawnga state mipuite mamawh a phuhruk thei tawh dawn tih sawiin, kawng tam takah hmasawnna thlentu a nih a beisei thu a sawi. 

Hun rei tak chhung mipuiten dawhthei taka an nghak chu lawmawm a tih thu sawiin, tunah chuan rel chak ṭha tak an nghak chhuak ta a ni, a ti. Shatabdi Express hi rel tlan chak tak leh chuan nuam tak a ni a, Rajdhani leh Duronto tih lohah chuan a chak berah ngaih a ni. Shatabdi Express hi Assam khawpui Guwahati - Dibrugarh inkarah a tlan ṭhin dawn a ni. Rel hi air-condition niin, passenger-te chu ei leh in tur pek an ni ṭhin ang.

Minister Gohain chuan, Prime Minister Narendra Modi chuan hmarchhak hmasawnna a ngaipawimawh hle tih sawiin, a bik takin inkalpawhna ṭha siam kawngah nasa takin hma lak a nih thu a sawi.

Railways minitsry chuan hmarchhak hmun hrang hrang­ah huang an zauh zel tih sawiin, hmachhawp tam tak an neih thu a sawi. Inkalpawhna a ṭhat chuan khualzin tam zawkin hmarchhak an tlawh dawn nia sawiin, hemi tihlawhtling tur hian theihtawp chhuah mek a ni, a ti.

Shatabdi Express pawh hi khualzinte hipna pawimawh tak a nih tur thu a sawi bawk.