Sorkar laipuiin Assam-ah Aerotropolis din tum

Union Minister of State for Civil Aviation Jayant Sinha chuan Assam-ah metropolitan subregion, aerotropolis-a din turin sorkar laipuiin hma a la mek tih a sawi.

Assam Chief Minister Sarbananda Sonowal leh Union Minister Sinhna chuan Thawhṭanni khan meeting an nei a, aerotropolis din chungchang an sawi dun. Sinha chuan aerotropolis dinna tur hian ram acre 2,000 vela zau a ngai a, a hmun tur ngaihtuah mek a ni, a ti. Assam-a aerotropolis din hian nasa takin civil aviation leh air connectivity lamah nasa takin hmasawnna thlen beisei a ni, a ti. Minister chuan aerotropolis hi Assam khawpui Guwaha­ti-a Brahmaputra lui hnaiah din tura tih a ni a, hma lo la zui turin Assam CM Sonowal chu a ngen bawk.

Assam CM pawhin Aerotropolis din chuan kawng tam taka hma­sawnna a thlen thei dawn tih sawiin, hmarchhak chuan inkalpawhna kawngah rahbi thar a chuangkai leh dawn ta a ni, a ti. Hei hian ram chhung mai ni lo, Asia ram dangte nena inkalpawhna kawngah hmasawnna a thlen a beisei tih a sawi. Sonowal chuan Union minister chu Guwahati-Bangkok leh Guwahati-Singapore direct flight service a awm theih nan hma lakpui turin a ngen. Hei bakah hian Sadiya - Dhubri inkara Brahmaputra lui kamah airport din a nih theihna turin civil aviation ministry-ah rawtna thlenpui turin a ngen bawk.