Manipur-ah Tanker Driver-te'n nawrh huaihawt

Manipur-a oil tanker driver-te chuan Thawhṭanni aṭang khan nawrh an huaihawt a, an himna ngaihtuah sak turin state sorkar an phut.

Oil tanker driver-te chuan lambun an tawk fo chu an hrethiam lo takzet tih an sawi a, an himna turin sorkar chu chak zawka hma la turin an phut tih an sawi. An thil phut hi a hlawhtlin hma loh chuan nawrh hi an kalpui tur thu an sawi. Tunhnai khan tanker driver-te hian beih an tawk a, helten kawng lakah an lambun a ni. Lambunna thlengah hian driver pahnihin hliam an tuar a, damdawi-inah dahluh an ni. He thil thleng hi an dem takzet thu leh, tun hnuah chuan thleng tawh lo se an duh thu an sawi.

State sorkar chu Na­tional Highway (NH)-a in lambunna a thlen tawh lohna turin venhimna ṭha zawk pe turin an phut tih, oil tanker driver-te chuan an sawi. March 15 aṭanga BJP kaihhruai sorkar a din hnuah NH-ah hian inlambunna ṭum hnih a thleng tawh a ni. Manipur sorkar chuan oil tanker leh bungraw phur truck-te venghim turin Central Reserve Police Force (CRFP) eng emaw zat a dah a, heti chung hian inlambunna a thleng fo a, nunna chan eng emaw zat an lo awm tawh bawk. Assam aṭanga Manipur panna NH-ah hian helte chetna a hluar hle a, silai leh ralthuam dangte chelek ṭhin a nih avangin a him lo hle a ni. United Naga Council (UNC)-te'n NH kawngpui pahnih an dan chah lai pawhin inlambunna lo thleng fo tawh a, hemi tireh tur hian state sorkar leh sorkar laipui pawhin hma an la ve mek bawk.

Hetih lai hian Director General of Police L.M. Khaute chuan tunhnai khan lambunna thleng ṭhina mawhphurtua puh, Kuki Revolutionary Army mi leh sa pathumte chu man an nih thu a sawi.