Assam-a kangmei chhuakah in 40 chuang kang ral

Assam khawpui Guwahati-a Dighalipukhuri tank area-ah Thawhlehni zan khan kangmei nasa tak a chhuak a, chenn-in 40 chuang a kang ral.

Kangmei hi SK Bhuyan Road aṭanga chhuak a ni a, thi leh hliam an awm hriat a ni lo. Zan dar 8 velah kangmei hi chhuak ṭanin, darkar hnih hnu velah ṭhelh mih chauh a ni. Kangmei chhuah chhan hi hriat ala ni lo a, chhui chian mek a ni. Kamrup (Metro) district Deputy Commissioner Dr M Angamathu chuan kangmei chhuak avanga chenna-in nei lote chu Textile Institute leh Kamrup Academy School-ah awm tir an nih thu a sawi a, state sorkarin a theih ang angin a ṭanpui tih a sawi.

Minister Himanta Biswa Sarma chuan kangmei nasa tak chhuak chu pawi a tih thu sawiin, mawhphurtu zawn chhuah a ni ang, a ti. Chenna-in nei lo chhungkaw 40 chuangte chu an chenna tur ngaihtuah sak an nih tur thu sawiin, state sorkar chuan ṭanpuina awm thei angte a ngaihtuah sak dawn a ni, a ti.

Guwahati Police Commissio­ner Hiren Nath chuan kangmei chhuah chan hi chhui mek a nih thu a sawi a, gas cylinder puak aṭanga inṭan nia an hriat thu a sawi. Thil puak ri ring tak hriat a nih hnuah mipuite chu an himna zawngin pawnah an tlan chhuak a, thi leh hliam an awm lo a ni. Kangmei chhuahna Dighalipukhuri tank area hi mirethei chenna hmun a ni a, ni tina inhlawh chawpa eizawngte an nih avangin ṭanpui an ngai hle tih a sawi bawk. In kang chhe hlut zawng hi hriat thei mai a ni lo bawk.