Manipur CM-in truck driver-te venhimna ṭha zawk pek tiam
Manipur Chief Minister N Biren Singh chuan truck leh oil tanker driver-te chu venhimna ṭha zawk pek a tiam.
Thawhlehni khan CM Biren Singh-a leh All Manipur Petroleum Products Drivers’ Association leh All Manipur Petroleum Products Transporters’ Association-te chuan Chief Minister Secretariat-ah meeting an nei a, venhimna ṭha zawk pek an nih tur thu hi a sawi a ni. Pawl pahnihte chuan tunhnaia Kangpokpi district-a driver-te'n beih an tawh chungchang hi CM an sawipui a, tun hnuah a thlen tawh lohna tura hma la turin an ngen. Kawng lakah helten an lambun fo chu hriatthiam har an tih thu sawiin, an nunna atana thil hlauhawm tak a nih thu te an sawi a ni.
Pawl pahnihte hian tun hnaia beih an tawh duh lohna leh, venhimna ṭha zawk pek phutin Thawhṭanni aṭang khan nawrh an huaihawt a, an thil phut a hlawhtlin hma loh chuan an kalpui tur thu an sawi. CM hoa meeting an neih tak avang leh, venhimna ṭha zawk pek an nih tur thu Biren singh-a'n a sawi tak avangin nawrh hi an tihtawp zui rin a ni.
CM Biren Singh chuan DGP office-ah engtik lai pawha biak theih turin hotline number (0385-2450214) dah a nih tur thu a sawi a, harsatna an neihte chu hriattir ṭhin turin a ti a ni. Driver-te leh an handymen-te chu he number-ah hian harsatna an tawh chang pawhin hriattir vat ṭhin turin a ngen a, National Highway-a inlambunna thleng ṭhin titawp turin hma lak zel a ni ang, a ti.
Chief Minister chuan Assam aṭanga Manipur panna National Highway-a inlambunna thleng ṭhin tihtawp a nih theih nana hmalakpui turin Assam Finance Minister Himanta Biswa Sarma a dawr tur thu sawiin, hma lakpui a tiam niin a sawi bawk. Meeting hi Transport Commissioner chuan a telpui bawk.