Droupadi Murmu-in Assam leh Meghalaya a tlawh

India ram President thar thlanna neih tura BJP kaihhruai National Democratic Alliance (NDA) candidate Droupadi Murmu-i chuan Thawhlehni leh Nilaini khan Assam leh Meghalaya state a tlawh a, rorellai MLA-te chu inthlan lo awm turah thlawp turin a sawm.

July 18-a President thlanna neih tur atana campaign-in, Murmu hian state hrang hrang a tlawh kual mek a ni.

Thawhlehni khan Murmu hian Assam thlengin, zanah rorellai BJP leh a thawhpui Asom Gana Parishad (AGP) leh United Peoples’ Party Liberal (UPPL) MLA leh MP-te chu Guwahati-ah meeting a neihpui a ni. Assam BJP hian Lok Sabha-ah MP pakua leh Rajya Sabha-ah MP pali, AGP leh UPPL-in Rajya Sabha MP pakhat ve ve an ni. Member 126 awmna Assam legislative assembly-a hian BJP hian MLA 62, AGP leh UPPL-in pakua leh pasarih an nei ve bawk.

AIUDF hotu Badruddin Ajmal chuan President thlan turah hian an party chuan Murmu hi an thlawp dawn tih a sawi bawk. AIUDF hian Lok Sabha-ah MP pakhat leh state legislature-ah MLA 15 a nei a ni.

Assam aṭangin nimin khan Murmu hian Meghalaya a pan leh a, Meghalaya-a rorellai, Meghalaya Democratic Alliance (MDA) MLA leh MP-te chu Orchid Lake resort-ah meeting a neihpui leh bawk. Meghalaya-ah hian National People's Party (NPP) kaihhruai MDA sorkarah hian BJP pawh a tel a, BJP hian MLA pahih a nei. Congress MLA hrem mek pangate pawhin Murmu an thlawp dawn tih an sawi.