Nagaland Dy CM-in police 5-te lawmman pe

Nagaland deputy chief minister Y Patton chuan a escort team-a Nagaland police panga-te chu July 2-a mi panga su hluma tlanchhe zui, truck umzuia an man avangin an hnathawh ṭhat lawmman, Rs 20,000 ṭheuh a hlan.

Home ministry changtu ni bawk, Dy CM Patton hian police department hnenah police pangate hi an huaisen leh hnathawh ṭhat man chawimawina hi pe turin a hrilh a ni.

July 2 khan truck pakhat chuan Chumukedina district-a Jharnapani-a Indian Council of Agriculture Research Institute bul, Kukidolong area-ah zonal taxi a su a, a tlanchhe zui a ni. A motor sut vang hian mi panga an thi a, midang pathumin hliam an tuar bawk. Taxi sutu truck tlanchhia an hmuhin police escort party hian umzui nghalin, thui tak an um hnuah truck hi umphain a khalhtu pawh an man zui bawk.

Truck umzuitu police-te hi Deputy Chief Minister escort team-a mi an ni a, Dimapur airport-a Dy CM an thlah zo, Kohima-a an kir lamin taxi sutu truck hi an hmu a, an umzui a ni. Truck hi Imphal aṭanga Dimapur pan a ni a, a sut taxi hi Kohima lam pan a ni thung. Taxi-ah hian driver leh passenger pasarih an chuang a, truck-in a sutna hmunah hian mi pathum an thi nghal a, hliam zinga pahnih chu damdawi-in panpui an nih hnuin an thi zui ve leh bawk. Hliam tuar dangte hi Dimapur-a Christian Institute of Health Sciences and Research-ah enkawl mek an ni.

Patton chuan a escort party-a police-ten pawikhawihtu man tura chak tak leh huaisen taka an che chhuak nghal leh, thil thlen dan video thlenga an lo la hman chu a fak hle a, police dangte pawh a ṭul a nih chuan an duty piah lama che chhuak thei tura inring reng turin a chah zui bawk.