Karan Johar-a'n Assam tan Rs nuai 11 pe

Bollywood director-producer Karan Johar chuan Assam-a tuilian tuarte ṭanpuina atan Assam Chief Minister's Relief Fund-ah Rs nuai 11 a pe.

Chief minister Himanta Biswa Sarma chuan a twitter-ah Karan Johar-a'n ṭanpuina pek hi tarlangin, Assam tuilian tuarte chhawmdawlna atana a hmalakna chu fakawm a tih thu a sawi.

Bollywood director Rohit Shetty leh actor Arjun Kapoor-te pawhin CMRF atan hian Rs nuai nga ve ve an lo pe tawh bawk a, film and music producer leh T-Series neitu Bhushan Kumar-a'n Rs nuai 11, singer Sonu Ningam-a'n Rs nuai nga an lo pe tawh bawk.

Anni bakah mi langsar dang eng emaw zatin tuilian tuarte ṭanpuina turin CMRF-ah hian sum an pe bawk a, an zingah hian Reliance Industries Limited hotu Mukesh Ambani leh Tibetan sakhaw hotu Dalai Lama-te pawh an tel a ni.

Assam tuilian hian ziaawm lam pan zel mah se, district 20-a mi nuai 11 velin harsatna an la tawk a ni. Cachar district chu harsatna la tawk nasa berin, mi nuai 6.31 a la nghawng a, Nagoan leh Morigoan district-ah mi eng emaw zatin harsatna an la tawk bawk.

April 6 hnua Assam-a tuilian leh leiminin chhiatna a thlena thi hi mi 184 an tling tawh. Thawhlehni khan tuilian vang hian mi pali an thih belh leh a ni.

Assam State Disaster Management Authority (ASDMA)-in a tarlan danin, nimin thleng khan district 15-a sorkarin relief camp leh distribution centre 383 a siamah mi 1,48,122 an la khawsa a, an zingah hian naupang 44,190 an tel.