Manipur-a BJP kaihhruai sorkarin a term hmang zo dawn : Ram Madhav
BJP general secretary Ram Madhav chuan Manipur chief minister N Biren Singh kaihhruai ṭangrual sorkar chu a term hmang zoin, kum 2022 thleng sorkarna a siam zui dawn tih a sawi.
BJP in-charge for Northeast state, Madhav hi Manipur-a BJP kaihhruai sorkarin buaina a tawh mek chinfel dan ngaihtuahin Nilaini khan Imphal a thleng a ni. Media miten an kawmnaah, ṭangrual sorkar dinhmun chu a derthawng lo a, kum 2022-a Assembly inthlan neih leh hma chuan a sorkar chhunzawm zel dawn tiin a hrilh.
Chief minister N Biren Singh pawhin ṭangrual sorkar an nih avangin party-te inkarah inhriatthiam lohna a awm ngei a, mahse hei hi central lama an hotute chuan chinfel tumin hma an la mek a ni, a ti. An buaina chu chhungkaw thil a ni a, an chinfel ngei tur thu leh, hlauhthawnna an neih loh thu a sawi.
June 17 khan ṭangrual sorkar thlawptu zinga MLA pakua - BJP MLA pathum, NPP MLA pali, Trinamool Congress leh Independent MLA pakhat ve ve chuan sorkar thlawpna hi an hnukdawk a ni. BJP MLA pathumte hi bangin Congress an zawm nghal bawk.
Ṭangrual sorkar chhunga buaina a awm avang hian NPP national president leh Meghalaya chief minister Conrad K Sangma leh Assam minister, North East Democratic Alliance (NEDA) convenor ni bawk Himanta Biswa-te chu Pathianni khan Manipur-ah kaliin, NPP MLA pali helte chu meeting an neihpui a ni. Hemi hnu hian NPP MLA-te Delhi-ah hruai thlak an ni a, home minister Amit Shah, BJP national president JP Nadda leh central-a BJP hruaitu dangten an kawm a, an lungawi lohna leh thilphutte an sawipui a ni.