Sorkar laipui, Manipur sorkar leh UNC-te’n inbiakna nei leh dawn

Sorkar laipui, Manipur sorkar leh United Naga Council (UNC)-te chuan inbiakna an nei leh thuai dawn nia tarlan a ni.

Newmai News Network-in a tarlan dan chuan inbiakna hi karleh khian neih tura ruahman a ni a, a ni tur erawh tarlan a ni lo. Sorkar laipui, Manipur sorkar leh UNC aiawhten inbiakna an neih hnuhnun ber chu March 19 kha a ni a, he hunah hian inremna siam fel a ni lo. Inbiakna hi April 19-a neih leh tura tih ni mah se a hlawhtling lo. UNC-te chuan inbiakna nei leh tur hian sawmnna an dawn loh thu an lo sawi tawh a, sorkar chu a thutiamah ding nghet tura an duh thu an lo sawi tawh bawk.

UNC President Gaidon Kamei chuan state chief minister Biren Singh-a kaihhruai sorkarah beiseina sang tak an neih thu sawiin, an thil phutte tihhlawhtlin sak thuai an duh tih a sawi. March 19-a inbiakna neih zawh hnuah sorkar ngenna angin Nationaal Hioghway (NH) dan an titawp a, sorkar chu an thil phutte tihhlawhtlin sak ve tura an phut thu a sawi. Sorkar laipui nena inremna Memorandums of Understanding (MoU) an ziah chu a taka tihhlawhtlin an phut thu sawiin, sorkar chu a thutiamah ding nghet turin an duh tih a sawi.

Gaidon Kamei chuan sorkar laka an thil phut chungchangah an dinna ngaiah an la ding reng tih sawiin, an hlawhtlin hma loh chuan an nawr zel tur thu a sawi. UNC-te hian state sorkarin Naga-te chenna, Jiribam leh Sidar Hills-te district-a a hlankai tawh chu sut leh an phut a ni. State sorkarin nikum kumtawp lama district thar pasarih zet a din duh lohna lantirin UNC-te hian nikum November 1 aṭanga kumin march 19 thleng khan, Manipur chakkhai lamna kawngpui pawimawh an dangchat a, lirthei eng emaw zat hal a ni bawk.

Inremna siam turin Ministry of Home Affairs (MHA) hmalaknain, state sorkar leh UNC aiawhte chuan inbiakna an lo nei fo tawh a, mahse tun thlengin inremna tluan­tling siam ala ni lo thung.