Manipur Congress Court-ah zualko dawn

Manipur Congress-te chuan an party MLa paruk-te disqualify an nih theih nan High Court-ah an zualko tur thu Nilaini khan an sawi.

Manipur-a Congress MLA parukte chuan Bha­ra­tiya Janata Party (BJP) an zawm a, hemi chung­chang­ah hian Congress party-te an lungawi loh avangin, MLA-te hi dis­qua­lify an nih theih nan court-a zualko hi an tum ta a ni.

State Congress Vice President K. Joykishan chuan MLA parukten BJP an zawm danah hian thil dik tawk lo a awm tih sawiin, party hriatpuina loa chhuak an nih thu a sawi. T. Shyamkumar, G. Zou, Y. Surchandra, S. Bira, O. Lukhoi leh N. Haokip-te hian party-a an nihna bansan hmasa loin BJP hi an zawm a, hei hi dan kalh a ni, a ti. Joykishan chuan Chief Minister ni ta N. Biren Singh pawhin BJP a zawm khan Congress-ah vice President a ni a, a nihna aṭangin banna a thehlut lo bawk niin a sawi. MLA-te chuan party pakhat aṭanga party dang an zawm dawn a nih chuan MLA an nihna aṭangin banna an thehlut phawt tur a ni tiin, an party MLA-te’n BJP an zawm danah thil dik tawk lo a awm thun a sawi.

Manipur-ah hian aseembly election neih zawh takah khan BJP chuan party dang thawhpuiin sorkar thar a din a, kum 20 chhung zet rorel tawh Congress chu party mala seat la hnem ber ni chungin sorkarna an siam lo. An party MLA pali-te chuan tunhnai khan BJP an zawm a, MLA 24 chiah an nei tawh a ni. Inthlan hma khan MLA ṭanglai pahnihte chuan BJP hi an lo zawm tawh bawk.