Tripura : BJP leh CPM inkara buaina chhuakah mi 16 hliam

Tripura-a rorellai Communist Party of India (marxist) (CPM) leh Bharatiya Janata Party (BJP)-te inkarah buaina nasa tak a chhuak a, mi 16-in hliam an tuar.

Party pahnihte inkara buaina hi hmun hrang hrangah a chhuak a, hriat theih chinah mi man an la awm lo. Police-te chuan party pahnih hruaitute chu meeting neihpuiin, buaina chhuak tireh tura hma la turin an ngen. Buaina hi Amtali area-ah te, Dhalai district-a Dharmanagar leh Kamalpur bakah, Khowai district-a Teliamura-ahte a chhuak a ni. Kamalpur-ah chuan mi panga in hliam an tuar a, an zinga mi palite chu CPM mi leh sa an ni. Yuva BJP activist-te chuan SFI state secretary Nabarun Deb chenna-in an bei a, BJP-te hi Yuva Morcha worker-te chuan ṭanpuiin, hun eng emaw chen National Highway (NH) - 44 an dang chat.

Dharmanagar-ah pawh BJP supporter-te chuan rorel lai CPI-M party chu kawngpui siam chhe lutukah puhin an mi leh sa te an bei a, mi pathumin hliam an tuar a ni. CPI-M chuan he thil thleng hi chhui chian an phut tih an sawi a, mawhphurtute chu dan anga hrem an phut thu an sawi. State BJP president Biplab Kumar Deb pawhin IGP hmuin, buaina a punlun zel loh nana dan leh thupek khauh zawka kengkawh turin a ngen a ni. Party pahnih worker-te hi lungten an inṭawng a, mi eng emaw zatin hliam an tawrh phah a ni. CPI(M)-te chuan an party mi leh sa ten beih an tawk chu pawi an tih thu an sawi a, an pawmzam mai dawn lo tih an sawi. Party general secretary Sitaram Yechury chuan buaina chhuaka hliam tur hi mi 30 an tling tawh niin a sawi a, buaina hi ni hnih vel kalta aṭanga inṭan niin a sawi.

Hetihlai hian BJP National president Amit Shah chuan vawiin hian Tripura hi a tlawh dawn a, ni hnih a cham ang. A cham chhung hian nakkuma state assembly neih tur atan an party tan a campaign dawn a ni. Party hruaitute meeting a neihpui dawn bakah, vantlang inkhawmah te thu a sawi ang. President hi Union minister of state for health chuan a ṭawiawm dawn a ni. Prime Minister Narendra Modi pawhin Tripura hi election neih hma ngeiin a tlawh dawn nia tarlan a ni bawk.