Meghalaya sorkarin Zirtirtute hlawh tih-pun remti

Meghalaya sorkar chuan government-aided school-a zirtirtu 7,000-te hlawh chu 100%-a tihpun a remti.

Thawhlehnia cabinet meeting chuan zirtirtu hlawh tihpun hi a remti a, January 1, 2017 aṭanga chhutin hman a ni ang. Chief Minister Mukul Sangma chuan, hei hi School Education Directorate leh school managing committee-te rawtna anga kalpui a nih thu a sawi. Hlawh tihpun tur hian lower primary teacher 2450, upper primary teacher 2532 leh Hindi teacher 844 -te a huam dawn a ni. State sorkar chuan hlawh tihpun a nih tak avang hian cheng vaibelchhe 63.34 vel a sen belh dawn a ni.

Government-aided school zirtirtute hlawh tihpun a nih hma hian state sorkar chuan secondary leh higher secondary adhoc school-a zirtirtute hlawh a lo tihpun sak tawh bawk. Chief minister Sangma chuan zirtirtute hlawh tihpunna tur hi budget session-ah sawiho a ni tawh thu sawiin, budget-ah dah a ni, a ti.

State Health Minister Roshan Warjri chuan Anatomy cabinet-in Act hman ṭan a remtih thu sawiin, mitthi tu tih hriat lohte ruang chu endik ṭhin a ni dawn tih a sawi. He Act chungchang hi session neih leh hunah sawiho leh remtih a nih thu a sawi bawk.