Sorkar laipuiin Assam tan Rs vbc 324 pe

Sorkar laipui chuan tuilian leh leimin vanga harsatna nasa tawk mek, Assam tan State Disaster Response Fund (SDRF)-ah Rs vbc 324.40 a pe.

Assam sorkar hian an state-a chhiatna nasa tak thleng avangin, chhiat tawkte ṭanpui leh chhawmdawl hna thawhna atan Ministry of Home Affairs hnenah SDRF-a central share aṭangin second instalment chu pe hma turin a ngen a ni. Ningani khan sum hi pek an nih thu chief minister Himanta Biswa Sarma chuan a sawi.

CM Sarma chuan sorkar laipui chungah lawmthu sawiin, tuilian vanga harsatna an tawh mek leh, tuilian tuarte ṭanpuina kawngah nasa takin a pui dawn tih a sawi.

Kuminah Assam-ah hian ruahsur nasa avanga tuilian leh leiminin chhiatna hrang hrang a thlenah mi 187 in nunna an chan tawh a, chenna in leh infrastructure dang bakah, thlai chinna ram pawh a chhe nasa hle. Inter ministerial central team (IMCT) pawhin state chhunga tuilianin thil a tihchhiatte enfiahin an lo tlawh tawh bawk a ni.

Tuilian tuarte tan hian sorkar chuan district 16-ah relief camp leh distribution centre 295 a la siam mek a, heng hmunah hian mi nuai 1.35 la khawsain, an zingah hian naupang 40,000 chuang an awm. Cachar chu tuilian tuar nasa ber district la niin, Nagaon leh Morigaon district-teah pawh mi tam takin harsatna an la tawk a ni.