Sorkar hna ruak hnawhkhah vek a ni ang - Tripura BJP

Tripura-a sorkar hna ruak zawng zawng chu hnawh khah vek a ni ang tiin state BJP hruaitu Subraa Chakraborty chuan Ningania BJP state executive meeting neihah a sawi.

Udaipur, Gomati district-ah BJP state executive meeting hi neih a ni a, senior leader Phanindranath Sarma, BJP state in-charge Vinod Sonkar, chief minister Manik Saha leh CM lui Biplab Kumar Deb-ten an hmanpui.

State BJP thupuangtu, Chakraborty chuan an state-a BJP kaihhruai sorkar chuan sorkar hna ruak awmte a rang thei anga hnawhkhah turin chak takin hna lak runpui a kalpui dawn tih a sawi. Hei bakah hian Durga puja hmain beneficiary thlan chhuahte hnenah social pension, thla khat atan Rs 2,000 zel pekna tur pawh pawm a ni, a ti bawk. State budget a pharh ṭumin, deputy chief minister Jishu Dev Verma chuan social pension, thla khata Rs 1,000 pek ṭhin chu Rs 2,000-ah tihpun a ni dawn tih a lo sawi tawh a ni. Social pension hi mi nuai 3.81 hnenah pek a ni.

Chakraborty chuan India-in zalenna a hmuh champha, August 15-ah a lawmna atan state chhunga chhungkaw tinte chu an inah India hnam puanzar zar vek turin an ngen dawn tih a sawi a, flag leina nei lo chhungkuate chu an party chuan a thlawnin flag hi a sem dawn tih a sawi.