Tuilian vangin chenna in 30,000 - 40,000 a chhia : Assam CM

Assam chief minister Himanta Biswa Sarma chuan kuminah an state-a tuilian vangin chenna in 30,000 - 40,000 a chhe tawh tih sawiin, tuilian tuarte ṭanpuina turin National Disaster Response Force (NDRF) aṭang fund pe turin sorkar laipui a ngen.

Chief Minister Sarma hian Zirtawpni zan khan union home minister Amit Shah hmuin, tulian vanga chenna in chhiate chhawmdawl leh an intesiamṭhatna turin, NDRF fund advance-a pe tur hian a ngen a ni.

Amit Shah nena meeting an neih zawh hnua chanchinthar lakhawmtute a kawmnaah, Shah chuan an state-a tuilian chu sorkar laipuiin team a tirhten an endik hnuah 'chhiatna nasa tak' tia an sawi thu a tarlang. Home Minister chuan a ngen chu home ministry-in an ngaihtuah tur thu pawh a lo hrilh tih a sawi bawk.

Sorkar laipui hian SDRF fund-a central share aṭangin Rs vbc 324.40 chu Assam sorkar hnenah a lo pechhuak tawh bawk a ni.

Assam tuilian hi a ziaawm chho zel a, hetih lai hian tuilianin a nghawng hi mi nuai ruk vel an la awm. Assam State Disaster Management Authority (ASDMA) chuan Inrinni thleng khan tuilian hi district 11-a khaw 506-a mi nuai ruk chuangin an la tuar tih a sawi a, heng zingah hian Cachar district-a cheng mi nuai 4.2 an awm a ni.

Kumin April thla aṭanga tuilian leh leimin vang thi hi mi 190 an tling tawh a, tuilian tuarte tan relief camp 130 siam la niin, heng hmunah hian mi 50,1677 an la khawsa mek.