Meghalaya-a dan loa coke plant dinte pawisa chawi turin hriattir

National Green Tribunal (NGT) Eastern Zone Bench chuan Megalaya-a East Jaintia Hills district-a dan loa coke plant din 31-te chu sum chawi turin a hriattir a, state sorkar hnenah pawh kum 2021 hma lama plant lo din tawhte chunga hma lak dan tur chu thla li chhunga ngaihtuah turin a ti.

NGT-in dan loa coke plant dinte hnenah pawisa chawi tura a tih hi Rs vbc 4.75 a tling. Heng plant-te hi Meghalaya State Pollution Control Board (MSPCB) aṭanga phalna nei lo a din an ni. Hei vang hian environmental compensation atan sum hi chawi turin a ti a ni.

MSPCB chuan kumin May 10 khan NGT hnenah hian dan loa coke unit 31 dinte hi suprise checking an nei a, hemi hnu hian East Jaintia Hills District Court-ah complaint an thehluh thu a hriattir a ni. Board aṭanga phalna nei lo din plant-te sum chawi tir tur hi buaipui mek a nih thu pawh a sawi.

NGT hnena affidavit a thehluhah, MPSCB chuan state sorkar chuan phalna neia din, coke oven plant 12 ding mekte chu state sorkar chuan an awmna hmun sawntir tumna a nei lo tih tarlang bawkin, coke unit pahnih tih loh hi chu khua aṭanga meter 500 huam chhunga awm vek an ni, a ti. Hetih lai hian danah chuan coke plant-te hi mihring chenna hmun, hospital, school leh tourist spot aṭanga km khat aia hlaah tal a awm tur tih a nih thu a tarlang bawk.