UDP-in Meghalaya Speaker laka mawi lo taka che State BJP minister hremna pe turin sorkar phut

Meghalaya state-a ṭangrual sorkar, Meghalaya Democratic Alliance (MDA)-a tel, United Democratic Party (UDP) chuan state minister leh BJP MLA Sanbor Shullai chu Assembly Speaker Metbah Lyngdoh laka a chet mawi loh avangin hremna pe turin sorkar a phut.

UPD hruaitute chuan kar liam taa NDA presidential candidate, Droupadi Murmu hoa meeting an neih ṭumin, BJP minister Shulai hian UDP president leh Assembly speaker Lyndoh thusawi lai chu a lo tibuai niin an sawi a, a chetdan mawi lo tak avang hian chief minister Conrad K Sangma chu inrawlh turin an ngen a ni.

CM Sangma pawhin UPD party lungawi lohna hi a hriat thu leh, BJP minister Shullai hi Murmu-i'n an state a tlawh ṭuma a chet mawi loh avangin a ṭul dan angin action lak a ni dawn tih a sawi ve bawk.

Hetih lai hian state BJP president Ernest Mawrie chuan July 6-a Murmu hoa meeting neih ṭuma an party MLA mawi lo taka che nia puhna chu a pawm lo tih a sawi thung a, "UDP president hian Meghalaya-a Kristian-te tihduhdah chungchang a sawi a, hei hi Shullai hian lo chhangin chutiang thil thleng a awm lo tih a sawi mai a ni," a ti ve thung.