Sorkar laipuiin Assam leh Arunachal District 3 te ‘Disturbed Area'-ah puang

Sorkar laipui chuan Assam state pum leh Arunachal Pradesh-a district pathum te chu ram buai, “disturbe area'-ah a puang a, thla thum dang atan sipai hnena thuneihna sang pekna, Armed Forces (Special Powers) Act (AFSPA) a pawtsei bawk.

Home Ministry chuan thuchhuah siamin, Assam-ah tharum thawhna leh inrikrapna a thleng fo a, hmun tam takah tualthahna leh tharum thawhna a thleng ṭhin a ni, a ti. A bikin Meghalaya leh Assam inrina hnaiah tharum thawhna a hluar em em a, heng hmunah te hian AFSPA chu thla thum chhung atan pawhsei leh a ni ta a ni, a ti. Assam-ah hian United Liberation Front of Assam (ULFA) leh National Democratic Front of Bodoland (NDFB) bakah hel pawl dang eng emaw zat an che ṭhin tih a tarlang bawk.

Assam-ah hian kum 2016 chhungin tharum thawhna leh inrikrapna ṭum 75 zet a thleng Home Ministry chuan a tarlang a, he thilah hian mi 33 zetin nunna an chan tih a sawi bawk. Pawikhawihna leh tharum thawhna thlengah hian security force mi leh sa 18 zet an thi tel a, an zinga pali chu kahhlum an ni, a ti. Kumin chhungin Assam-ah vek hian tharum thawhnaa ṭum kua zet a thleng leh tawh a, nunna chan mi pali an awm tawh. Nunna chante hi civil mi pahnih leh security force mi pahnihte an ni. Heng pawikhawihna thlengah hian ULFA leh NDFB-te chu mawhphurtuah ngaih an ni a, Naga hel - National Socialist Council of Nagaland (NSCN) leh National Socialist Council of Nagaland - Isak-Muivah (NSCN-IM)-te pawh an inrawlh niin a tarlang bawk.

Hetih lai hian Arunachal-a district pathum te chu Home ministry chuan ‘Disturbe Area'-ah a puang bawk a, heng hmunah te hian thla thum chhung atan AFSPA pawh sei a ni a, May 4 aṭanga hman ṭan a ni. Arunachal Pradesh leh Assam-ahte hian kum 2016 khan thla ruk chung atan AFSPA hi pawhsei a lo ni tawh a, Home Ministry chuan thla thum dang atan a pawhsei belh leh ta a ni.