Tripura-ah party malin sorkarna kan siam dawn : BJP National President

Bharatiya Janata Party (BJP) National President Amit Shah chuan nakkum-a Tripura state assembly neih turah party mala sorkarna an siam tur thu kar kalta Inrinni khan a sawi.

Amit Shah chuan, "Rorel lai Left Front paihthlain BJP chuan sorkarna a siam dawn a, party mala sorkarna siam thei turin theihtawp kan chhuah dawn an ni" a ti. Communist Party of India - Marxist kaihhruai (CPI-M) kaihhruai Left Front-in kum 25 chhung zet thuneihna an chan tawhna chu tihtawpin a awm dawn a, sorkar thar a piang dawn a ni, a ti. Ram chhung hmun hrang hrangah BJP chuan rin phak bakin hma an sawn chak tih sawiin, hei hian hmarchhak state te pawh a tuam chho mek a ni, a ti. Central-a Congress kaihhruai United Progressive Alliance (UPA) sorkar a din lai khan eirukna a hluar hle tih sawiin, kum 10 ro an rel khan eirukna chuan nasa takin bu a khuar tih a sawi. BJP kaihhruai National Democratic Alliance (NDA) sorkar a din hnuah ramin nasa takin hma a sawn a, ram chhung hmun kilkhawr ber thlengin hmasawnna hmuh theihnin a awm a ni,a ti.

NDA sorkar chuan hmar­chhak hmasawnna a ngai­pawi­mawh hle a, Prime Minis­ter Narendra Modi-a ngaihpawi­mawh ber pakhat a ni, BJP president chuan a ti. Modi-a kaihhruai sorkar chauh chu Tripura tana hmasawnna tak tak thlen theitu a nih thu sawiin, hna thawk thei turin 2018 assembly-ah mipuiten an thlan tlin ngei a beisei tih a sawi. Tripura-in nakkum February thlaa election a hmachhawn turah mipuite chuan BJP hmalakna te hriain sorkarna siam turin an thlawp a beisei tih sawiin, state mipui mi nuai 37-te chu an party thlawp turin a sawm. State chhungah ṭhalai hnathawh tur nei lo mi tam tak an awm a, heng mite tan hian kawng hawn sak an ni dawn tih a sawi. Left Front sorkarah state mipui 65% zet chu mi rethei an ni a, heng mite chawikan nan hian ruahmanna siam a ni, a ti.

BJP National president Amith Shah hian ni hnih chamin Tripura a tlawh a, nakkum-a state assembly election neih turah an party tan a campaign a ni. A cham chhung hian party hruaitute meeting a neihpui bakah, vantlang inkhawmah te thu a sawi a ni. Thu a sawinaah hian BJP-in Tripura state hmasawnna tura ruahmnna siam hrang hrangte a tarlang a, sorkarna an siam chuan sorkar hnathawkte tan 7th Pay Commission hman a nih tur thu te a sawi. Hei bakah hian Congress kaihhruai UPA sorkarin 13th Finance Commission-ah Tripura sorkar budget atana cheng vaibelchhe 7,283 a ruahman sak thu leh, hei hi BJP akihhruai NDA sorkarin 14th Finance Commission-ah cheng vaibelchhe 25,396-ah a tihsan sak thu te a sawi bawk a ni. Amith Shah hi Assam Finance Minister Himanta Biswa Sarma, Union Minister Faggan Singh Kulaste, party General Secretary Bhupendra Yadav leh hruaitu lawk eng emaw zatin an ṭawiawm a, Pathianni khan New Delhi-ah a let leh a ni.