NF Railway chungchang Railway Board-ah thlen a ni dawn: Suresh Prabhu

Railway Minister Suresh Prabhu chuan Northeast Frontier Railway chungchang chu Railway Board-ah thlen a nih tur thu kar kalta Inrinni khan a sawi.

Minister Suresh Pra­bhu hian Assam khawpui Guwahati-a press con­ference-ah he thu hi sawin, NFR aṭanga West Bengal leh Bihar-te paih a, hmarchhak thlur bing tura ruahmanna kalpui a nih thu a sawi a ni. Indian Railways chuan hmarchhakin railway lama hma a sawn zelna turin kum 2016-17 atan budget a dah cheng vaibelchhe 7,100 chu, kum 2017-18-ah chuan veibelchhe 8,000-ah tihpun a ni, a ti. Hei bakah hian project ṭhahnem tak kalpuina turin vaibelchhe 13,000 ruahman belh a nih thu a sawi. Tun hnai kum thum chhungin hmarchhak huamchhungah rel kawng km 1,000 zet sial a nih tawh thu sawiin, heng te hi hman ṭan tawh an ni, a ti.

Suresh Prabhu chuan, railway ministry chuan electric hmanna tih tlem zel a tum thu sawiin, ni tha chakna hmang uar tura hmalakna kalpui mek a ni. Hei hian sum tam tak luangral tur a veng dawn a, tun aṭanga kum 10-ah chuan ministry chuan cheng vaibelchhe 41,000 vel luangral tur a veng thei dawn a ni, a ti. Ram chhungaah electric hmanna 42% chauh a awm tawh tih sawiin, tihtlem zel turin hmalak a ni. Tun aṭanga kum liah chuan hei hi a zahveah tihniam hman beisei a ni.

Railway Minister hian kar kalta Inrinni khan Raninagar-Jalpaiguri-New Bongaigaon-Guwa­hati railway line chu a hawng a, rel kawng siam nan hian cheng vaibelchhe 655.55 hman a ni. Hei bakah hian solar power plant KWP 700 pe chhuak thei tur chu Guwahati-ah a hawng bawk. Tun hnai kum thum chhungin railway ministry chuan rel kawng siam nan cheng vaibelchhe 19,000 zet a hmang ral tih a sawi bawk.