Uninion minister-in AP-Assam Railway Line lungphum phum

Union Minister of Rail­ways Suresh Prabha­kar Prabhu chuan, Assam-a Mur­kongselek leh Arunachal Pardesh-a Pasighat inkal­pawhna tur broad gauge railway lungphum chu Pathianni khan a phum.

Union minister Suresh Prabhu hian lungphum hi Guwahati-a N. F. Railway headquarters Maligaon aṭangin video conferencing hmangin a hmanpui a ni.

Aruanchal chief Mi­nister Pema Khandu, Rail­way Minister of State Rajen Gohain, Minister of State for Home Affairs Kiren Rijiju, Deputy Chief Minister Chowna Mein, Minister, Parliamentary Secretary leh sorkar mi pawi­mawh eng emaw zat chu a hawnna hmun, Naharlagun railway station-ah an tel a ni. Hemi rual hian Chief Minister Khandu chuan Naharlagun leh Guwahati inkara tlan Shatabdi Express service hmasa ber chu a vailiam bawk.

Shatabdi Express hi Arunachal leh Assam inkalpawhna tura duan a ni a, Pathianni aṭang khana tlan ṭan a ni.

Minister Suresh Prabhu chuan, tun hnai kum thum chhungin Indian Railways chuan inkalpawhna changtlung zawk siamna atan cheng veibelchhe nuai 3.5 vel zet a hmang ral tawh tih sawiin, hei hian hmun tam takah hmasawnna a thlen mek a ni, a ti. Ramchhung hmun dang aiin hmarchhak state-ahte railway ministry chuan hma a la nasa zawk tih sawiin, sorkar laipui chuan rel kawng siamna turin cheng vaibelchhe 90,000 zet a ruahman tih a sawi. Ministry-in a tum ber pakhat chu mi tin ban phaka hmasawnna thlen tir a nih thu sawiin, chu mi tur chuan rel kawng ṭha neih chu thil chhen fakawm tak a ni, a ti.

Arunachal CM Khandu pawhin rel hmanga inkalpawhna chu ram hmasawnna kawnga thil pawimawh tak leh ṭangkai berte zinga mi a nih thu a sawi. Assam leh Arunachal te inkalpawhna kawng chu a inhawng chho mek zel tih sawiin, hei hian state pahnihte tan hmasawnna tam tak a thlen a beisei thu a sawi. Khandu chuan Prime Minister Naredra Modi-a'n hmarchhak hmasawnna tur ruahmanna hrang hrang a siam chu lawmawm a tih thu sawiin, chu chuan kawngdik a zawhpui mek niin a sawi. Hei bakah hian highway ministry-in an state chhunga inkalpawhna kawngpui siamna tur cheng vaibelchhe 50,000 a ruahman sak chu lawmawm a tih thu a sawi bawk.

Minister of State for Railways Rajen Gohain leh Minister of State Home Affairs Kiren Rijiju-te chuan lungphum phumna hun­ah hian thu an sawi ve bawk.