Southeast Asia nena inkalpawhna atan hmarchhak hman a duh

Prime Minister Narendra Modi chuan, sorkar laipui chuan India hmarchhak chu Southeast Asia ramte nena inkalpawhna leh insumdawn tawnna kawng­pui atan hman a duh tih Pathianni khan a sawi.

Mahse faina kawngah hmarchhak a hnufual avangin hei hi a thleng lo palh thei a ni, a ti.

PM Modi chuan, hmar­chhak state-te chu faina kawnga an hnufual reng chuan sorkar laipui chuan a thil tum hi a tihlawhtling thei dawn lo a, mipui chengten ziak leh chhiar an thiam a ngai a, kawng engkimah hma an sawn a ngai a ni, a ti. Modi chuan sawi chhunzawmin, ram chhunga khawpui fai tehna-a Sikkim khawpui Gangtok top 50-a a lang phak chu lawmawm a tih thu sawiin, hetih rual hian hmarchhak khawpui dangte chu faina kawngah hma an sawn a ngaih thu a sawi. Modi hian Pathianni khan Sillong-a conference neih chu video conferencing hmangin a telpui a, he thu hi a sawi a ni.

Modi chuan, a kaihhruai sorkar chuan hmarchhak hmasawnna turin kawng hrang hrangin hma a la mek tih a sawi a, Southeast Asia ramte nena insumdawn tawnna kawngah pawh hmarchhak chuan hmun pawimawh tak a chan theih nan hma lak mek a ni, a ti. Sorkar laipui hmalaknate thlawp tura state pasariha cheng mipuite chu sawmin, sorkar hmalakna dodal zawnga che lo turin a ngen. Hmarchhak hmun hrang hranga inkalpawhna kawngpui siamna turin sorkar laipui chuan cheng vaibelchhe 40,000 a ruahman a ni, a ti. Heng bak­ah hian railway project 19 zet kalpui mek a ni a, power lama intodelhna tur project eng emaw zat duan a nih thu a sawi bawk.

Sorkar laipui scheme - Ude Desh ka Aam Nagarik (UDAN) hnuaiah hmarchhakah airport din chhoh mek zel a nih thu PM Narendra Modi chuan a sawi bawk.