NSCN-IM in inremna an ziah tawh sût tumah sorkar laipui puh

Nagaland buaina chinfel tuma sorkar laipui nena inbiakna nei mek, National Socialist Council of Nagaland-Isak-Muivah (NSCN-IM) chuan sorkar laipui chu Framework Agreement an lo siam tawh sût a, inremna thar siampui tumah a puh.

Kum 2015, August 3 khan sorkar leh NSCN-IM hian Framework Agreement (FA) hi an lo ziak tawh a ni. Mahse inbiakna an neih leh mekah, sorkar laipui hian 16 Points Agreement version thar siamin, hemi hmanga inremna siampui tumin a nawr niin Pathiannia an thuchhuahah an tarlang.

An thuchhuahah hian, Indo-Naga political talk neih mek chu Framework Agreement an lo ziah tawh tihchhiat tumna a awm an duh lo a, hetianga puitling lo taka thiltih hi an hre ngai lo tih an sawi. 16 Point Agreement hnuaia Nagaland state din a nih ang chiah khan, central intelligence agency-te chuan inbumna leh inphatsanna kalpuiin, bumhmang angin an che leh a ni, an ti.

"Arunachal Pradesh-a Tirap, Longding leh Changland-a Naga mite hmu tura Naga National Political Groups (NNPGs) convenor Kitovi a kal khanAssam Rifles chuan an zui tlat a ni. Naga CSO ṭhenkhat pawh Agreed Position thlawp lo thei lo turin vau bawk," tiin NSCN-IM thuchhuah chuan a sawi. Hei vang hian AP-a Naga hruaitute pawhin inbiakna neih mekah an dinhmun dik tak chu hrilh turin an ngen phah a ni tiin an sawi.

Hetianga sorkar laipuiin ruahmana a lo siam hi a ngeiawm hle a ni tiin, inremna siam duhna thinlung an pu tak tak a nih leh, langtlang taka kalpui a nih chuan heng buaina hi pumpelh thei a ni tiin, NSCN-IM leh Naga mipuite chuan a hmaa an lo tihsual tawhna ang khan an tihnawn lohna turin ṭhendarh tumna policy ṭha lo tak chu an pawm thei ngai dawn lo tih an sawi bawk a ni.