Assam journalist-in ‘Covering Climate Now Award 2022’ dawng

Assam-a independent multimedia journalist, Chandrani Shina-i chuan ‘Covering Climate Now Award 2022’ a dawng a, Indian journalist zingah he chawimawna dawng thei awmchhun a la ni.

Shina hian climate change leh environment chungchang ziak ṭhinin, video documentary pawh a siam a ni. Award hi ‘The laments of Brahmaputra’ video documentary a siam aṭangin pek a ni. He documentary-ah hian hla leh culture hmangin Assam-a climate change tuartute harsatna leh natna tawhte a pholang. Climate change chungchanga a hnathawh hrang hrangte hi khawvel huap pawhin hriat a hlawh tawh hle.

Award dawngtute hi World Channel-ah October 25 hian an puala darkar khat hun buatsaihah an lang ang.

Covering Climate Now Journalism Awards, 2022 dawngtu mi 23 zingah hian Guardian, Agence-France Presse, Al Jazeera, PBS NewsHour, Globo, HBO Max, Third Pole, Grist, the Post and Courier, Los Angeles Times, leh WGBH- PRX journalist-te pawh an tel a, TIME senior correspondent Justin Worland chu Climate Journalist of the Year-ah puan a ni bawk.