Assam Assembly-ah GST bill pharh
Assam legislative assembly special session chu Thawhṭanni khan neih ṭan a ni a, Goods and Services Tax (GST) Bill pharh a ni.
Special session hi Dispur-ah neih a ni a, Finance Minister Himanta Biswa Sarma chuan GST bill hi a pharh a ni. GST Bill bakah hian bill dang paruk pharh a ni dawn a, heng zingah hian Assam Appropriation Bill and Assam taxation (Amendment) bill pawh a tel. Session neih chhung hian opposition party-te chuan National Register of Citizens (NRC) kalpui mek chungchang an sawi chhuah rin a ni.
Minister Sarma chuan Assam Goods and Services Tax Bill, 2017 hnuaiah hian luxury goods-ahte chhiah lak dan tur bithliah tawh a nih thu sawiin, 0%, 5%, 12%, 18% leh 28%-te lak a nih tur thu a sawi. Mipui nawlpui mamawh thilah chhiah lak tihsan a ni dawn lo tih sawiin, 5%, 12% leh 28%-te lak a ni ang, a ti. Luxury car, vaihlo aṭanag siam chhuah, leh in chi thilah te chhiah lak a sang dawn tih a sawi. Sarma chuan GST Bill hi hman ni dawn mah se, chhiah lak danah Assam VAT Act, 2003, Assam Entry Tax Act, 2008, Assam Amusement and Betting Tax Act, 1939, Assam Tax on Luxuries Act, 1989 leh Assam Health Infrastructure and Services Development Fund Act, 2009-te chu hman tel a la ni dawn tih a sawi bawk.
Assam legislative assembly special session hi ni thum chhung neih a ni dawn a, vawiin hian a tawp ang. GTS Bill hi state dang - Telangana, Bihar, Rajasthan, Jharkhand, Chhattisgarh, Uttarakhand, Madhya Pradesh leh Haryana-te chuan an lo pass tawh a ni. Tripura sorkar pawhin Thawhlehni khan Assembly special session neih a nih tur thu a puang a, Goods and Services Tax (GST) Bill pharh a ni ang. State Finance Minister Bhanulal Saha chuan GST Bill hi a pharh dawn a, May 23 khian special session hi neih a ni ang.