Manipur-a Bomb puakah sipai pahnih thi

Manipur-a Teng­noupal district-ah nimin zing khan bomb chak tak a puak a, 165 Battalion Territorial Army (B.Coy) mi pahnihin nunna an chan a, midang pahnihin hliam an tuar bawk.

Bomb hi Tengnoupal district-a Lokchao khua­ah zing lam dar nga vel khan a puak a, helai hmun hi Manipur leh Myanmar inrina bul a ni. Bomb puak hian sipai-te chuanna truck a tichhia a, hliam te hi damdawi-in panpui nghal an ni. Thi te hi Arjun Baral leh Varesho Hungyo te an ni a, hliam tuarte hi Churachandpur district leh Kakching district a mi te an ni. Sipaite hi an patrol zo, an awmna pana an haw lam chu mi tu tih hriat loh ten an lo bei a ni. Bomb hi vawi hnih a puak a, hliam te hi Leimakhong Army Hospital-ah enkawl mek an ni. Chief Minister N Biren Singh chuan he thil thleng hi a dem thu a sawi a, thi chungte leh hliam tuarte chu a tawhrpui takzet tih a sawi.

Hetihlai hian Mani­pur-ah vek hian Thawhṭanni zing khan bomb a puak a, hliam tuar sipai pathum zinga pakhat chu a hliam tuar loin a boral. Thi hi Rifleman Arjun a ni a, international border-a bomb puakah khan hliam na tak tuarin, Hospital panpui a nih hnuah a boral a ni. Bomb puahna hi Trans Asian Highway 102-ah a ni a, 165 Territorial Army-te chu helten bomb hmangin kawng lakah an lo bei a ni. Sipai pathumin hliam an tuar a, Leimakhong-a army hospital-ah dah luh an ni. He thil thleng hi chhui zui nghal ni mah se, tun thlengin man an la awm lo a, pawikhawihtute pawh hriat an la ni lo.