APCC-te'n sorkar laipui lakah lungawilohna lantir tum

Arunachal Pradesh Congress Committee (APCC)-te chuan state chhunga bank hrang hrangah mipui mamawh ang pawisa dah a nih loh chuan sorkar laipui laka lungawi lohna lantira nawrh huaihawt an tum thu an sawi.

APCC president Takam Sanjoy chuan, bank hrang hrangah mamawh zat pawisa a awm loh avangin mipuiten harsatna an tawk mek tih a sawi. Pawisa indaih lohna hi Prime Minister Naredra Modi-a kaihhruai sorkarin pawisa note lian pahnih Rs 500 leh Rs 1,000 note a tih thih vang a nih thu sawiin, an dem takzet tih a sawi. An harsatna tawh mek sutkian a nih thuai theih nan sorkar laipui chu chak zawka hma la tura an phut thu sawiin, an thil phut a hlawhtling lo a nih chuan state pumah nawrh huaihawt an tum thu a sawi. Sorkar laipui chu kar khat chhunga an ngaichang dawn tih a sawi bawk.

APCC-te tarlan dan chuan state khawpui Itana­gar leh district headquarters danga ATM-ahte pawisa lak chhuah tur a awm mumal loh avangin, ATM eng emaw zat chu khar a ni.