Manipur leiminah ruang 2 hmuh belh leh, ruang 52 la chhuak tawh

Manipur-a Noney district-a leiminin a chilhte ruang chu zawn chhunzawm zel a ni. Thawhṭanni khan ruang pahnih lakchhuah belh leh a ni a, heng mite nen ruang 52 lak chhuah a ni tawh.

Thawhṭannia ruang hmuhte hi railway construction site-a hnathawh, Venkata Sai Construction agency hnuaia thawkte nia hriat an ni.

Joint task force team chuan ruang zawn hna hi an la thawk chhunzawm zel a, nimin thleng khan mi pakua chu an chin hriat an la ni lo. Water resources, disaster and relief management minister Awangbow Newmai chuan chhiatna thlenna hmun hi tlawh lehin, hei hi vawi ruk a tlawhna a ni a, hna thawh mekte a enpui a ni.

Minister chuan chhanchhuah hna thawktu team-a official leh tualchhung mite chu review meeting a neihpui bawk, ruangte hmuh kim an nih hma chuan zawn chhunzawm zel a nih tur thu a sawi. Army, NDRF, SDRF leh volunteer-te pawh an theih anga pui chhunzawm zel turin a sawm nghal bawk.

June 30-a Noney district-a Makhuam hmuna railway station sakna hmuna leimin hi tun hnaia Manipur state-a chhiatna thleng rapthlak ber zinga mi a ni.

Sorkarin expert panel a din dawn
Manipur sorkar chuan an state chhunga leimin thlen duhna hmunte enfiah turin expert committee a din dawn.

High-level committee-ah hian Geological Survey of India leh Manipur Remote Sensing Applications Centre-a official-te an tel ang.

Chief minister N Biren Singh chuan Thawhṭanni khan July 8-a National Highway-102 Tipaimukh Road, Churachandpur-a leimin vanga thi chhungte hnenah zangnadawmna, Rs nuai nga leh, hliam tuarte hnenah Rs 50,000 leh Rs 10,000 a pe a ni. Leiminin an state chhunga chhiatna a thlen fo avangin, leimin theihna hmunte enfiah tura committee din a nih tur thu hi a puang nghal a ni.