Tripura-in Covid khuahkhirhna kalpui leh Thuneituten Covid hri kai 37 bepawp thei lo

Tripura sorkar chuan an state-ah Covid-19 hri kai an pun leh avangin hri leng laka invenna turin khuahkhirhna a siam thar leh. Hetih lai hian hri kai hmuh chhuah zinga 39-te chu thuneitu lamin an bepawp thei lo.

Chief secretary JK Sinha hoa state-level task force meeting neihah, khuahkhirhna hman leh hi an rel a ni. Pawn chhuahna hmun hrang hrang leh school-ahte face mask vuah vek tura tih leh niin,health department lam pawhin hri kaite hmuh chhuah ran an nih theihna turin mass testing an kalpui leh dawn bawk.

State Disease Surveillance Officer Deep Debbarma chuan thla riat chuang zet hri leng a ziaawm hnuah, hri kai hi an pung thar leh tih a sawi. July 4 khan positivity rate chu 1.79% niin, July 10-ah 7.12% ah a kai chho tawh a ni. "Nikum September thla aṭang khan hri kai an tlahniam zel a, hri kai thar pawh awm loin a thla tel te pawh kan awm hman a ni," a ti. Tuna hri kai rawn pung thar lehah a darhna ber chu Agartala Municipal Corporation huamchhung a ni tih sawiin, kar liam ta khan hri kai thar mi 131 an awm a, heng zinga 82 chu Agartala khawpui awmna, West Tripura huamchhungah a ni.

Hetih lai hian hri kai thar 131 zinga pariat chauh chu damdawi-ina dah ngai an ni tih Debbarma chuan a sawi a, hri kai hmuh chhuah zinga 37 chu an bepawp thei lo tih a sawi bawk. Heng mite hi biakpawh leh hmuh tumin hma an la mek tih a sawi. Hri kai thar zinga a tam zawk chu zin chhuahna nei lo a nih avangin, zin veivah kawngah khuahkhirhna siam tumna a awm rih lo tih Debbarma chuan a sawi bawk.