Assam : An hnaa inthlahdah avangin health worker 9 suspend

Assam sorkar chuan health worker pakua chu an duty ngaihthah leh inthlahdah vangin an hna aṭangin a supsend.

Dima Hasao district-a nu, nau vei pakhat chuan nau neih tumin Khepre primary health centre hi a pan a, mahse centre hi a lo inkhar a, a nau vei thisen chhuak nasa tak nena centre luhna bula a awm lai video chu social media lamah a darh a ni. He video a darh hnuah thuneitute chuan thil awmdan chhui zui nghalin, Dima Hasao disrict-a health services joint director, Dr Kalpana Kemprai chuan health centre-a thawk pakua-te suspend-na thupek hi Pathianni khan a tichhuak zui nghal a ni. Health worker suspend-te hi - medical officer, pharmacist pahnih , ANS pahnih, GNM pahnih leh Grade -IV staff pahnihte an ni.

Suspend-na thupek tihchhuahah hian Khepre PHC hi a inhawng mumal lo hle a, thawktute chuan an duty leh mawhphurhnate an hlen ṭha lo hle tih sawi a ni. Departmental enquiry zawhfel a nih hma chuan suspend an ni tih tarlan a ni.