Hmarchhak bialah gas pipeline phum dawn : Teli

Union minister of state for petroleum and natural gas, Ramewar Teli chuan hmarchhak state pumah gas pipeline phum a ni dawn tih Thawhṭanni khan a sawi.

Rameswar Teli chuan gas pipeline phumna tur atan Indian Oil, ONGC, GAIL, Oil Indian leh Numaligarh Refinery-te thawkhoin, project hi Indradhnush Gas Grid Lt (IGGL) in a thawk dawn tih a sawi nghal bawk.

Hmarchhak state pathum - Meghalaya, Mizoram leh Nagaland-ah oil leh natural gas zawn hna pawh thawh thuai a ni dawn tih Minister chuan a sawi bawk. "Heng state-a hmun ṭhenkhatah hian oil leh gas a awm tih kan hria a ni," a ti.

India ramin oil leh gas a mamawh zinga 83% chu ram dang aṭangin a lalut a, international market-a a man tihsan a nih chuan ram chhungah pawh fuel leh gas man hi tihsan a ni zel a ni, tiin tun hnaia ram chhunga fuel man tihsan a nih chungchang chu Teli chuan a sawifiah nghal bawk.