Manipur sorkar leh JAC-te inrem thei ta

Manipur sorkar leh Churachandpur district Joint Action Committee (JAC)-te chuan Nilaini khan inremna an ziak thei ta.

Congress kaihhruai sorkar chuan kum 2015 khan tribal bill pathum - The Protection of Manipur People Bill, 2015, The Manipur Land Revenue and Land Reforms (Seventh Amendment) Bill, 2015 leh The Mani­pur Shops and Establishments (Second Amendment) Bill, 2015-te a pass a, hei hi Churachandpur district-a tribal-te chuan nasa takin an dodal a ni. Tribal inzawmkhawm pawl JAC-te chuan bill duh lohna lantir hian vawi eng emaw zat nawrh an huaihawt a, tharum thawhna leh inrikrapna a thleng fo bawk. JAC leh police-te innawr buainaah tribal mi pakua zet an thi a, thi zinga mi pariat-te ruang chu tun thlengin phum a la ni lo. JAC-te chuan an thil phut a hlawhtlin hma loh leh, anti-triball bill chu sut leh a nih hma loh chuan heng ruangte hi phum an tum loh thu an sawi. Tribal martar-te ruang hi hospital-ah vawn ṭhat a ni a, May 25-ah ruangte hi phum a ni ang.

Kum 2017 state assembly elec­tion-a Congress party-in hnehna an chan zawh loh hnuah, BJP kaihhruai sorkar thar a ding a nu. BJP chuan sorkarna an chan chuan United Naga Council (UNC)-te'n tiam chin awm loa National High­way (NH) an dan tihtawp a nih theih nan hma an lak nghal tur thu leh, JAC-te nena remna zawnga inbiakna neih chu an ngaihpawimawh thu an sawi. State sorkar chuan UNC-te chu inremna alo siampui tawh a, tunkar Ningani khan JAC-te nen hian inbiain inremna an siam ve leh bawk. Memorandum of understanding (MoU)-ah hian sorkar laipui, state sorkar leh JAC aiawhte chuan hming an ziak a, May 25-ah ruangte hi phum remtih a ni. Sorkar laipui aiawhin Union Ministry of Home Affairs, Secretary A.K. Jha leh Manipur sorkar aiawhin Chief Secretary Oinam Nabakishore-te chuan MoU ah hian an hming an ziak a ni.

Chief Secretary Oinam Nabakishore chuan, “Tribal martar chhungte hi cheng nuai 10 ṭheuh pek an ni dawn a, an chhungkaw member zinga pakhat chu sorkar hna pek an ni bawk ang. Nunna chan mi pakua bakah, hliam tur mi 48-te chu zángnadawmna pek an ni ang" a ti. Chief minister hlui Ibobi Singh-a kaihhruai Congress sorkar chuan August 31, 2015 khan assembly-ah bill hi a pass a, hemi duh lohna lantir hian tribal-te chuan MLA, minister leh sorkar building-te chu nasa takin an suasam a ni.

The Protection of Manipur People Bill, 2015, The Manipur Land Revenue and Land Reforms (Seventh Amendment) Bill, 2015 leh The Manipur Shops and Establishments (Second Amendment) Bill, 2015-te hi India President Pranab Mukherjee pawmpui tura thawn ni. Mahse bill-ah hian thil dik tawk lo leh felhlel eng emaw zat a awm avangin President chuan a pawmpui lo a, dan hre mite zirchian tur leh, siam ṭhat leh tura tih a ni.