Manipur-ah Air Clinic buatsaih a ni dawn

Union Minister of State for Development of North Eastern Region (DoNER) Dr Jitendra Singh chuan Manipur-ah hmarchhak tan Air Clinic buatsaih a nih tur thu a sawi.

Minister Jitendra Singh chuan, Manipur-ah hmarchhak state-te tan Helicopter-base Air Clinic buatsaih a ni dawn a, hemi atan hian Union Ministry of Aviation leh Union Ministry of Health chuan hma an la mek a ni, a ti. Hemi atan hian Helicopter service provider eng emaw zat biak an ni tawh tih a sawi bawk. Thingtlang leh hmun kilkhawr zawka awm ten boruaka inkalpawhna kawngah hma an sawn theih nana ruahman a nih thu sawiin, heng hmuna chengten dam lohna leh emergency thila khawpui zawk an pan theih nana ruahman a ni, a ti. He thu hi Nilaini-a Manipur Deputy Chief Minister nen New Delhi-a an inkawmnaah a sawi chhuak a ni. Deputy Chief Minister hi Law & Health Minister, L. Jayantakumar leh Youth and Sports Minister Letpao Haokip ten an ṭawiawm a ni.

Dr Jitendra Singh hnenah hian Manipur sorkar aiawhte chuan mamawh hrang hrang an thlen a, DoNER ministry chu Manipur-a court-te tihchangtlun nana hma la turin an ngen a, district hospital-a cancer hospital dah a nih theih nan te, Chennai-a Adyar Cancer Institute nena thawhhona siam a nih theih nante hmalakpui turin an ngen. Hei bakah hian National Sports University din tura hmalakna kal mek chungchang an sawipui bawk.