Assam Assembly-in GST Bill pass
Assam Assembly chuan Goods and Services Tax (GST) Bill chu Nilaini khan lungrual takin a pass.
Finance Minister Himanta Biswa Sarma chuan Goods and Services Tax Bill, 2017 hi Thawhṭanni khan house-ah a pharh a, member-te chuan lungrual takin an pass ta a ni. Ni thum awh special session neih zawh takah hian GST Bill bakah, Assam Appropriation Bill and Assam taxation (Amendment) bill pharh a ni a, National Register of Citizens (NRC) kalpui mek chungchang sawiho a ni bawk. Finance Minister Sarma chuan Assam Goods and Services Tax Bill, 2017 hnuaiah hian luxury goods-ahte chhiah lak dan tur bithliah a nih thu sawiin, nitin mamawh aṭanga chhiah lak chu tihsan a ni dawn lo, a ti. GST Bill hi hman ni dawn mah se, chhiah lak danah Assam VAT Act, 2003, Assam Entry Tax Act, 2008, Assam Amusement and Betting Tax Act, 1939, Assam Tax on Luxuries Act, 1989 leh Assam Health Infrastructure and Services Development Fund Act, 2009-te chu hman tel a la ni dawn tih a sawi.
Sarma chuan GST hi a taka hmana nih dawn tak vangin, sorkar laipui, state sorkar leh mipuite chuan hlawkna an tel ṭheuh dawn tih a sawi. State sorkarin chhiah aṭanga sum a hmuh ṭhin chu a pung dawn tih sawiin, GST chuan eirukna leh hlemhletna pawh a veng thei dawn niin a sawi. Chief minister hlui Tarun Gogoi chuan Congress party chuan GST Bill chu an thlawp tih sawiin, mahse hei hian industry tenau ten harsatna an tawh an hlauhthawn thu a sawi. Chief Minister Sarbananda Sonowal pawhin house member-te'n lungrual taka GST bill an pass chu thil chhinchhiah tlak tak a ni a ti a, state sorkar chuan hmasawnna kawngah rahbi thar a tuk leh ta a ni, a ti. GST chu a nihna tur ang taka kalpui a nih a beisei thu sawiin, langtlang sorkar dinna kawngah a ṭangkai hle dawn a ni, a ti.
State Parliamentary Affairs minister Chandra Mohan Patowary chuan, Aadhar card pawh hman ṭan tum a nih thu sawiin, Home Department kaihhruainain General Administration Department (GAD) chuan hma an la dawn a ni, a ti. Aadhar chungchang hi Zero Hour-ah BJP MLA Devananda Hazarika chuan a sawi chhuak a ni. Patowary chuan zirlaiten state pawnah harsatna an tawh ṭhin avangin Aadhar card siam hi kalpui a ngai tih a sawi.