AP sorkarin GST kalpui turin Regional Office din dawn

Arunachal Pradesh assembly chuan Assam hnung zuiin, Zir­tawpni khan Goods and Services Tax Bill (GST) 2017 a pass ve leh a, GST kalpui tur hian Regional Office panga din a ni dawn.

Chief Minister Pema Khandu chuan, GST hian chhiah lak kawnga sum chheprelh awm ṭhin leh, eirukna awm ṭhin a ven tur thu a sawi. Chief Minister chuan thingtlang leh hmun kilkhawr zawka awmten harsatna an tawh lohna turin regional office panga din a ni dawn tih sawiin, Bill chung­changah district level training buatsaih tum a nih thu a sawi. Cabinet chuan GST registration chungchang a ngaihtuah thuai dawn tih sawiin, sumdawngte hnen aṭanga felfai zawka chhiah lak tum a ni, a ti. GST chuan state inrelbawlna leh chhiah lak kawngah nasa takin a pui thei dawn a, eirukna leh hlemhletna dona kawngah a ṭangkai hle dawn a ni, a ti bawk.

Arunachal special assembly session chu Zirtawpni khan neih a ni a, house member-te chuan Goods and Services Tax Bill (GST) 2017 hi lungrual takin an pass a ni.