Meghalaya Tura Civil Hospital-ah RT-PCR test nei ṭan

Meghalaya sorkarin an state-a Covid-19 test tam zawk neih a nih theihna tura a hmalakna kal zelah, kar liam ta Inrinni aṭang khan Tura Civil Hospital-ah RT-PCR test pawh kalpui ṭan a ni ve ta. 

Tura hospital-ah RT-PCR test neih hmasa berah hian sample 35 test a ni a, an khawl hmang hian ni khatah sample 90 test theih a ni dawn tih chief minister Conrad Sangma chuan a sawi. 

CM Sangma chuan Tura Civil Hospital-a thawktute chu RT-PCR test an tih theih ve tak avangin lawmpuina a hlan nghal bawk. 

Meghalaya-ah hian hri kai hmuh chhuah belh mi pakhat awm a, anni nen hian khan hri kai hmuh chhuah 48 an awm tawh. Hri kai  pakhatin a thihpui tawh bawk a ni. Hri kai hmuh tharte hi Border Security Force (BSF) sipai a ni a, Bihar aṭanga haw a ni. 

Hri kai tam zawk hi enkawl dam ni tawhin, enkawl mek panga an la awm. 

State sorkar chuan an mi leh sate hnenah Guwhati zin lo turin a hriattir. Guwahati-ah hian kai an pun belh zel avangin vawiin aṭangin ni 14 chhung total lockdown kalpui a ni dawn a ni.