Arunachal Assembly-in GST bill pass ve leh
Arunachal Pradesh assembly chuan kar kalta Zirtawpni khan Goods and Services Tax (GST) bill pass ve leh a, ram chuunga he bill pass state 12-na a ni. Kar kalta vek khan Assam assembly chuan GST bill hi a lo pass tawh bawk.
Arunachal Chief Minister Pema Khandu chuan Arunachal Pradesh Goods and Services Tax Bill, 2017 hi house-ah a pharh a, special session hi assembly building sak tharah neih a ni. CM Khandu chuan, GST bill-in a tum ber chu ram pakhata chengte chhiah lak dan inang ‘One nation one tax’ a ni a ti a, hei hi state sorkar sum a nghawng loh tur thu a sawi. GST hi Arunachal Pradesh anga state lian lo tan chuan a ṭha dawn hle a, state-in kawng tam takah hma a sawn phah a beisei thu a sawi. CM chuan GST bill pass a nih tak avangin district headquarters tinah infrastructure ṭha zawk an mamawh tur thu a sawi.
District tin te chu optical fibre hmanga thlunzawm an ni vek dawn a, IT lamah nasa taka ṭan lak a nih tur thu Khandu chuan an sawi. GST chuan state sorkar inrelbawlna kawngah nasa takin a pui thei dawn tih sawiin, sum luangral tur pawh nasa takin a veng dawn a ni, a ti. Arunachal CM chuan Prime Minister Narendra Modi-a kaihhruai NDA sorkar chu fakin, ram hmasawnna tura policy leh ruahmanna hrang hrang a siam te chu ṭha a tih thu leh a thlawp thu a sawi bawk. Arunachal Pradesh Goods and Services Tax Bill, 2017 hi house member-te chuan voice vote hmangin an pass a, assembly Speaker Tenzing Norbu Thongdok chuan Zirtawpni vek khan special session neih hi a titawp a ni.