Irom Sharmila-in pasal nei dawn
Manipur 'Iron Lady' Irom Sharmila Chanu chuan pasal a nei dawn hnai nia tarlan a ni.
Sharmila pasal tura sawi hi hun rei tak a lo kawp tawh Desmond Coutinho a ni. Coutinho hi Goa-a piang, British khua leh tui nihna nei a ni.
Sharmila hian Manipur assembly election neih zawh takah khan a chuh a, hnehna a chang zo lo. Hnehna a chan zawh loh hnu hian politics a chawlhsan leh nghal mai theih thu a sawi. Inthlan zawh hnu hian chawlh hmangin Kerala a pan nghal a, he hmunah hian Countinho nen hian an innei dawn nia tarlan a ni. Media-te chuan Iron Lady hian pasal neih a tum niin assembly election hma pawh khan an lo tarlang tawh a ni.
Sharmila hian Armed Forces (Special Powers) Act (AFSPA) hlih phutin kum 16 chhung zet chawnghei a kalpui a, nikum Aguast thla khan a tawpsan chauh a ni. AFSPA hlih a nih theih nan hma a lak zel tur thu alo sawi tawh a, politics luhchilha nasa zawka beih a tum thu a sawi bawk. Politics a luhchilh hnu lawkah party thar - People’s Resurgence and Justice Alliance a din zui a, inthlan neih zawh takah khan candidate pathum neiin, hnehna an chang zo lo a ni. A unaupa Irom Singhajit chuan Sharmila-i chungchang hi a hriatpui loh thu leh, pasal nei tur anga thu thang chu a hriat loh thu a sawi thung.