Manipur-in May 25-ah Rajya Sabha inthlan hmachhawn dawn

Election Commission chuan Manipur-a Rajya Sabha inthlan neih hun tur atan May 25 a ruat.

EC chuan Nilaini khan Rajya Sabha inthlan neih hun tur hi a puang a, Manipur bakah Odisha-ah May 25 khian neih an ni ang. Inthlan hi May 27-ah zawhfel tura ruahman a ni. Manipur-a Rajya Sabha seat khat ruak hi Congress MP Haji Abdul Salam-a kalsan a ni a, a ni hi kumin March 1 khan a boral a ni. Abdul Salam (69) hi Muslim zinga Manipur aṭanga Rajya Sabha ni thei hmasa ber a ni. Thoubal district-a Heibong Makhong-a piang a ni a, kum 2014 khan MP atan hian thlan tlin a ni. Wabagai assembly constituency aṭangin ṭum thum zet thlan tlin alo ni tawh bawk.

Rajya Sabha inthlan neih turah hian May 8-ah notification tihchhuah a ni ang a, chuh tumte tan May 15 thleng hming pek luh theih a ni ang.