Guwahati-ah vawiin aṭangin total lockdown

Assam state khawpui, Guwahati-ah chuan corona­virus kai an pun belh zel avangin mipuia hri darh tur venna atan vawiin aṭangin ni 14 chhung total lockdown puan a ni. 

Health minister Himanta Biswa Sarma chuan kar khat chhung chu lockdown hi khauh taka kalpui phawt niin; pharmacy, hospital leh testing laboratory-te chauh hawn phal an ni dawn tih a sawi. A kar hnihnaah erawh chuan boruak awmdan a zirin thlahdul deuh a ni ang, a ti. 

Assam sorkar chuan district tinah zan dar 7 aṭanga a tuk zing dar 7 thleng curfew puan a ni dawn tih a sawi a, hei bakah hian district tina khaw lian deuhah chuan Inrinni leh Pathianni apiangin inkharkhip a ni bawk dawn tih a sawi. 

State chhunga hri kai hmuh chhuah tawh hi mi  7,165 an tling tawh a, an zinga 4,814 chu enkawl dam ni tawhin damdawiin aṭangin chhuah tir an ni tawh. Enkawl mek hi mi 2,338 an la awm. 

Assam-a Covid-19 kai zingah hian Assam police-a SP pakhat bakah police dang 30 an tel. Mahse an ngaihtuahawm lo a, an dam thuai an beisei thu Additional Director General of Police (Law and Order) G P Singh chuan a sawi.  

Assam-ah Covid-19 sample test neih zat hi  3,74,519 a tling tawh a, sorkar labo­ratory 12 leh centre dang ṭhenkhatah test hi kalpui a ni.