Meghalaya TMC hruaituin Assam-Meghalaya border deal ṭhiah a tiam

Meghalaya Trinamool Congress (TMC) hruaitu leh chief minister hlui ni bawk, Mukul Sangma chuan nakkum state assembly inthlanah an party-in sorkar an siam chuan, tun hnaia Meghalaya leh Assam-in ramri chungchanga inremna an ziah chu ṭhiah a tiam.

"Thuneihna kan chang a nih chuan he inremna lo siam tawh hi kan ṭhiat leh ngei ang," tiin, state pahnih sorkarten inremna an siam hi an lo beisei ang a nih loh thu a sawi bawk.

Mukul Sangma chuan ramri chungchanga state sorkar pahnihten inbiakna an neih dan leh, a hnuah inremna an siam tak chu Meghalaya state mipuite tan pawm theih a ni lo, a ti. "Mipuiten an pawm lo a nih chuan, eng vangin nge hman luih a nih kher ang? Politician leh party member-te tan chuan kan mite venhim hi kan tihtur tur a ni," tiin a sawi.

Meghalaya-a rorellai, Nationalist People's Party (NPP) kaihhruai Meghalaya Democratic Alliance (MDA) sorkar chu Assam sorkarin a duh dan dana a thunun theih nia puhin, inremna an siam danah pawh Assam lam chu an hlim hle ang, a ti.

Rarmri hrula cheng, Garo mite chu inremna siam angin Assam lamah beh luih tir an ni a, hei bakah hian Assam-Meghalaya-ah an mi leh saten beih an tawk fo tih Sangma chuan a sawi. Mahse mipuite'n an harsatna tawh hrang hrangte an sawi ṭhin chungin, sorkar bakah political party-te chuan an mite venhimna lam hi an ngaihtuah lo a ni, tiin TMC hruaitu chuan a sawi.