BJP mi leh saten Tripura Congress hruaitute motor suasam

All India Congress Committee (AICC) Secretary leh Congress party in charge Tripura, Szarita Laiphlang leh Tripura Congress hruaitu Ashis Kumar Saha-te chu Thawhlehni khan BJP mi leh sa nia sawiten beiin, an motor pahnih an suasam sak bawk.

Congress hruaitute motor hi Agartala-Udaipur Naitonal Highway-ah chhun en laiin beih a ni a, police-ah complaint thehluh a nih hnuin BJP worker 12 lakah FIR ziahluh a nih thu an sawi. Mahse pawikhawihna thleng kaihhnawihah hian man an la nei lo.

Ashis Saha chuan BJP party office aṭanga rawn chhuak, mi 20-22 vel chuan tiang nen kawngpuia an motor ding hi panin an suasam zui ta niin a sawi. Saha leh Laitphlang-te hi Sepahijala district-a Congress office-a meeting nei tura kal an ni.

Saha chuan, "Congress party chu nasa taka sawiselin, tualchhung mite chu Congress party mi zingah an awm chuan an tuar dawn tiin an vau a ni. He pawikhawihna thlen lai hian a bul mai bazar-ah police-te pawh an awm a, mahse engtinmah an rawn ti lo. Director Genral of Police hnena kan thlen hnuah hma an la ve chauh a ni," a ti.

Tripura-a BJP sorkar chu eptu party-te tana hun siamsak duh lo leh, mipuite himna ngaihtuah duh lohah Szarita Laiphlang chuan a puh. "Chief Minister Dr Manik Saha chuan kan parliamentary team hnenah, a kaihhruai sorkar chuan pawikhawihna leh tharum thawhna thlentute man leh hrem ngei an nih theihna turin hma a la dawn tiin a lo tiam tawh a, mahse tun thlengin tumah man an la ni lo," tiin kar hnih liam taa Agartala-a Congress Bhawan leh, Congress MLA Sudip Roybarman beih a nih chungchang a sawichhuak ve bawk.