AAPSU-te'n Rajnath Singh hnenah memorundum thehlut
All Arunachal Pradesh Students’ Union (AAPSU)-te chuan kar kalta Zirtawpni khan Union Home Minister Rajnath Singh chu New Delhi-ah an hmu a, memorundum an thehlut.
AAPSU-te hi an president Hawa Bagang leh general secretary Tobom Dai hoin an thawk chhuak a, sorkar laipui leh Naga hel - National Socialist Council of Nagaland - Isak-Muivah (NSCN-IM) ten “Framework of Agreement” an ziah chungchanga an thil phut hrang hrangte Home Minister hnenah hian an thlen a ni. AAPSU chuan Rajnath Singh-a'n kumin February thlaa Arunachal a tlawh ṭum a, state Governor ruat chungchang leh, Chakma Hajong leh Assam nena an inrina chinfel thuai a nih theih nana an thil phut hrang hrang an thlente, chak zawka bawhzui an duh thu an thlen bawk. HM chuan sorkar laipuiin NSCN (IM)-te inremna tluantling ziahpui a duh thu zirlai pawl aiawhte chu lo hrilhin, hma lak mek reng a nih thu a sawi.
Governor nghet dah chungchangah thutlukna siam ala nih loh thu sawiin, Prime Minister Narendra Modi remruatna hnuaiah Governor dahsak thuai tum a nih thu a sawi. Hun rei tak chhunga Arunachal leh Assam-te'n ramri chungchanga buaina an tawh ṭhin chu chinfel dan kawng dappui a inhuam thu sawiin, state pahnih aiawhte nen inbiakna neia chinfel tum a nih thu a sawi bawk.
Sorkar laipui chuan kum 2015 khan Naga hel NSCN-IM-te hi “Framework of Agreement” a lo ziahpui tawh a, inremna tluantling ziah a nih theih nan hma lak zui ni mah se tun thlengin a la hlawhtling rih lo a ni. Pawl hrang hrangte chuan inremna tluantling ziahfel thuai a nih theih nan sorkar laipui chu chak zawka hma la turin an kar fo a, political party-te pawhin inremna ziahfel thuai an duh thu an sawi fo bawk. Union Home Minister Rajnath Singh chuan inrena siam tur hian hma lak mek a nih thu leh, inremna chuan Naga mipuite tan hamṭhatna a thlen ngei theih nan ruahmanna siam a nih thu, All Arunachal Pradesh Students’ Union (AAPSU) aiawhte nen an inbiaknaah hian a sawi lang bawk.