Manipur-ah petrol pump-te hawng leh ṭan

Manipur-a All Manipur Petrol Pumps Dealers Association-te'n hun eng emaw chen lungawi lohna lantira pump an khar hnuah, kar kalta Inrinni aṭang khan dan pangngaiin pump-te an hawng leh ṭan.

Kar kalta Zirtawpni khan Consumer Affairs, Food and Public Distri­bution (CAFPD) Director Ranjan Yumnam leh Petrol pump owner-te chuan inbiakna an nei a, inremna an siam tak avangin pump hawn hi an remti leh ta a ni. State sorkar chuan mipuiten harsatna an tawh lohna turin, pump neitute chu oil neih loh chhuanlama inkhar lo turin a lo hriattir tawh a, dan anga hrem an nih tur thu pawh a tarlang. CAFPD Director Ranjan Yumnam chuan sorkar thupek zawm loin pump pahnihte chuan oil an neih loh chhuanlamin May 4 aṭang khan pump an khar a, mahse hei hi endik a nih hnuah oil an ngah tawk tih hriat chhuah a nih thu leh, CAFPD department chuan a thlalak pawh an neih thlap thu a sawi bawk.

Hetih lai hian CAFPD depart­ment-in petrol pump owner-te'n pump neituten a black-a zuarte hnenah an hralh chhawng anga tarlan a ni chu thu belhchian dawl lo a nih thu sawiin, ngaihdam dil an phut thu an sawi. All Manipur Petrol Pump Dealers Association Secretary H. Rajeswor chuan sorkar deparment-te chuan a black-a zuarte hi an pek chhawn

ṭhin zawk thu sawiin, an puhnaah ngaihdam an dil a nih loh chuan an nawr zui zel tur thu a sawi. Hemi chungchangah hian Chief Minister N. Biren Singh-a hnenah May 8 khan memorandum an thehlut tawh thu Rajeswor chuan a sawi. Mahse tun thlengin sorkar aṭangin chhanna leh ngaihdam dilna an la dawng lo tih sawiin, petrol pump neitute chuan lungawilohna an lantir tak thu a sawi.

Manipur-ah hian pump khar a nih vangin petrol litre khat man chu cheng 150 a kaichho hman nia tarlan a ni a, state sorkar chuan mipuiten harsatna nasa zawk an tawh lohna turin pump neitute chu inhawng turin a lo hriattir tawh bawk. Kar kalta Zirtawpni-a inbiakna neih hi Minister of Consumer Affairs, Food and Public Distribution (CAFPD) Karam Shyam chuan a telpui a, Manipur Petrol Pump Dealers Association aiawh leh sorkar aiawh eng emaw zat an tel bawk.