ULFA-I-te'n ṭhalai tam tak an la ṭhin : Assam DGP
Assam Director General of Police, Mukesh Sahay chuan hel pawl lian tak - United Liberation Front of Assam-Independent (ULFA-I) te chuan an state chhung hmun hrang hrang aṭangin an pawl zawm turin ṭhalai tam tak an la ṭhin tih a sawi.
DGP Mukesh Sahay chuan, “ULFA-I-te hian an commander-in-chief Paresh Baruah kaihhruainain, Assam hmun hrang hrang aṭangin an pawl zawm turin ṭhalai eng emaw zat an la ṭhin a, hei hi tun thlengin an la kalpui a ni" a ti. He thu hi kar kalta Zirtawpni a, Army 4 Crops Headquarters, Tezpur-a high-level security meeting neih
ṭumin a sawi chhuak a ni. Mukesh Sahay chuan ULFA-I mai bakah hian National Democratic Front of Bodoland (Songbijit)-te chuan state chhung hmun hrang hrangah pawikhawihna an thlen ṭhin tih sawiin, nunna chan leh hliam tuar eng emaw zat an awm tawh thu a sawi. ULFA-I leh NDFB-S-te bakah hian Bangladesh-a hel pawl Jamatul Mujahaddin-te chuan Assam leh hmarchhak hmun hrang hrangah pawikhawihna an thlen fo a, hemi doletna kawngah hian nasa zawka ṭan a ngaih thu a sawi. Prime Minister Narendra Modi-a'n Assam a tlawh hunah pawh hel laka beihpui thlak dan tur chungchang an sawi chhuah tur thu a sawi a ni.
Assam DGP chuan helte pawikhawihna laka invenna turin venhiman khauh zawka kalpui a nih thu sawiin, Guwahati khawpui-ah pawh circuit camera dah tura ruahman a ni, a ti. Tunhnaia M P Jewellers showroom, Guwahati-a hmaituam tu tih hriat lohten dawr rawka rangkachak ṭhahnem tak an lak chungchang sawiin, venhimna ṭhat tawk loh vang a ni, a ti. Helte chetna do let turin mipuite thlawpna an mamawh thu a sawi bawk. High-level security meeting hmanpuitu, Chief Secretary V K Pipersenia pawhin sorkar hna thawk, an chunga mite tihduhdan tuar an awm chuan a hnenah emaw DGP special branch-ah emaw hriattir ṭhin turin a a ngen a, mipuite chu social media hman kawngah fimkhur turin a chah ve bawk.
Security meeting hi Prime Minister Narendra Modi-a'n May 26-a Assam a tlawh tur denchhena buatsaih a ni a, helte chetna a thlen lohna turin venhimna khauh zawka kenkawh tum a ni. Modi hian ram chhunga lei sei ber, Assam leh Araunchal Pardesh inkalpawhna tur lei chu May 26 khian a hawng dawn a, hei vang hian venhimna khauh zawka kenkawh dan tur ngaihtuah mek an ni.