Manipur : May 19-ah UNC leh sorkar aiawhte inbe dawn

Sorkar laipui, Manipur sorkar leh United Naga Council (UNC) aiawhte chuan May 19 hian Senapati Town, Manipur-ah district chungchangah inbiakna an nei leh dawn.

Ministry of Home Affairs (MHA) chuan hemi chungchangah hian state sorkar leh UNC aiawhte chu hriattirna a pe tawh. MHA hmalaknain kar kalta khan North East Chief Secretaries’ meeting neih a ni a, inbiakna neih hun tur hi ruatfel a ni. March 19 khan Senapati-ah inbiakna hi neih a lo ni tawh a, April 19-ah neih leh tura tih a ni. Eng emaw rokhawlhna avangin inbiakna neih hun tura ruat hi sawn a lo ni tawh a, tunah erawh a hun tur tihchian a ni ta a ni.

UNC President Gaidon Kamei chuan Chief Minister Biren Singh-a kaihhruai sorkarah rinna an nghah thu leh, beiseina sang tak an neih thu a lo sawi tawh. Kamei chuan, March 19-a inbiakna neih a nih ṭum khan sorkar lam ngenna angin, tiam chin awm loa National Highway (NH) an dan chu tihtawp an lo remti tawh tih sawiin, sorkar nen inremna siam a nih thu a sawi. He hunah hian memorandum of Understanding (MoU) pali ziah a ni a, inbiakna neih leh tura tih a ni bawk. Hetih rual hian state sorkar chu a lo intiam tawhna tihlawhtling loah UNC-te chuan an puh a, an ram leh hnam himna tura an beih zel tur thu pawh an sawi bawk.

Manipur-ah hian kum 2016 khan Congress kaihhruai sorkar chuan district thar pasarih zet a din a, hei hi UNC-te chuan nasa takin an dodal a ni. Naga-te chuan hmasang ata tawha an rama an chhal, hmun ṭhenkhat chu district-ah hlan kai a nih thu sawiin, hei hi an pawm thei lo tih an sawi. State sorkar chu a thutlukna sut leh tura phutin, Jiribam leh Sidar Hills-te chu engti kawng zawng mahin district-ah hlankai an remti ngai dawn lo tih an sawi. Sorkar laka lungawilohna lantir leh, thutlukna sut leh tura phut hian nikum November 1 aṭang khan, Manipur chakkhai lamna kawngpui pawimawh NH 2 leh 37-te chu tiamchin awm loin an dang chat a, hei hian nunphung a tikhaihlak nasa hle. Oil leh nitin mamawh lamah harsatna nasa tak tawk chhoin, a awm chhun pawh man to tak taka hralh a ni a, zirna-in eng emaw zat khar a ngai hial bawk.

BJP kaihhruai sorkar a din hnu kumin March thla khan kawngpui dan hi tihtawp a ni ta chauh a ni. NH dan tihtawp ni mah se UNC-te thil phut tih hlawhtlin ala nih loh vangin inremna tluantling siam a la ni lo a, May 19-a inbiakna neih leh tur hian kawngro thui tak a neih rin a ni.